‎Ni icyemezo cyafashwe n'iyi minisiteri ku wa 05 Mata 2026, aho kigaragaza ko iri gurisha rishobora kugera ku gaciro ka miliyoni 373.6 z’Amadolari ya Amerika.

‎Nk’uko byatangajwe, Ukraine  yari yasabye kugura ibikoresho bigizwe n’uduce dushyirwa ku bisasu bisanzwe tukabihindura iby'ibiyoborwa neza, birimo 1,200 byo mu bwoko bwa KMU-572 n’ibindi 332 byo muri  KMU-556.

‎Ibi biziyongeraho n’ibindi bikoresho bifasha mu mikorere y’izo ntwaro, birimo uburyo bwo kuzituritsa, ibikoresho byo kuzisana no kubibungabunga, porogaramu zifasha mu mikorere yabyo, inyandiko z’ubuhanga, ubwikorezi, ubushakashatsi, n’ubufasha mu bya tekiniki n’imicungire y’ibikoresho.

‎Amerika yagaragaje ko iri gurisha rigamije gushyigikira intego zayo za politiki mpuzamahanga n’umutekano, binyuze mu gufasha igihugu gifatanyabikorwa kongera imbaraga mu mutekano no guteza imbere ituze rya politiki n’ubukungu ku mugabane w’u Burayi.

‎Biteganyijwe ko ibi bikoresho bizafasha Ukraine kongera ubushobozi bwo guhangana n’ibibazo by’umutekano by’ubu n’ibizaza, cyane cyane mu rwego rwo kurinda ikirere cyayo no gukora neza ibikorwa byo kwirwanaho.

‎Nanone byagaragajwe ko Ukraine ifite ubushobozi buhagije bwo kwakira no gukoresha neza ibi bikoresho mu ngabo zayo, kandi ko iri gurisha ritazahindura ku buryo bugaragara uburinganire bw’ingufu za gisirikare mu karere.

‎Isosiyete y’Abanyamerika ya Boeing Company, ikorera mu Mujyi wa St. Louis muri Leta ya Missouri , ari nayo izatanga ibyo bikoresho yemeje ko iri gurisha ritazagira ingaruka mbi ku bushobozi bwayo bwite mu by’umutekano n’ingabo.

Izi ntwaro Ukraine izikeneye mu gihe ikiri mu ntambara ikomeye ihanganyemo n'u Burusiya, imaze imyaka igera hafi kuri ine n’amezi abiri.