Haringingo Francis yabigarutseho mu kiganiro n’itangazamakuru nyuma y’umukino ikipe ya Rayon Sports yatsinzwemo na AS Muhanga igitego 1-0. Ni umukino Rayon Sports yarushijwe cyane kuko wabonaga itarimo gutera mu izamu cyane kuko yari yinjijwe igitego kare.

Uyu mutoza wa Rayon Sports, yatangaje ko nubwo batsinzwe ariko atekereza ko akiri ku gikombe cya Shampiyona kuko abona na APR FC bahanganye ishobora kuza gutsindwa na Al Hilal SC.

Yagize ati “ Narabivuze, bizajyana n’umukino w’uyu munsi. APR FC ifite umukino ukomeye, ntabwo tuzi uko uzajyenda. Nekereza ko umuntu igikombe agitakaza igihe shampiyona yarangiye. Turacyari mu rugamba rwo guhanganira igikombe. Dusigaje imikino ishobora kuduha amahirwe nubwo ari macye ariko nibaza ko ibintu byose bigishoboka.”

Haringingo Francis yagarutse ku mvune ya Ramazani Tshimanga wavuye mu kibuga umukino utarangiye atangaza ko imvune ye ishobora kuba idakomeye ariko atangaza ko imvune Fall Ngagne yagize ari imvune izatuma atongera gukina muri uyu mwaka w’imikino.

Uyu mutoza wa Rayon Sports kandi yagarutse ku mikino iyi kipe isigaje gukina muri Shampiyona ndetse agaragaza ko gukina n’amakipe arwana no kutamanuka ari ibintu biba bigoye cyane.

Yagize ati “ Umupira ntukunda agasuzuguro. Umukino ni umukino, urabona ko ikipe ya nyuma ishobora gutsinda indi kipe. Ikipe zirwana no kutamanuka, nizo biba bigoye gukina nazo kuko zikina zitanga cyane. Ntabwo twinjiye mu mukino hakiri kare bituma dutsindwa igitego bitunanira kugaruka.”

Ikipe ya Rayon Sports gutsindwa uyu mukino n’ikintu gisa nk’icyabakuye ku gikombe kuko amanota 7 irushwa na APR FC biragoye ko yavamo nubwo iyi kipe ifite Al Hilal SC na Al Merrikh SC zo muri Sudani.

Ikipe ya Rayon Sports iri ku mwanya wa kane n’amanota 49 ku rutonde, mu gihe ikipe iyoboye izindi za hano mu Rwanda ni APR FC ifite amanota 56.