Inkuru iri kugarukwaho cyane muri Nigeria ni iya Maj Gen Rabe Abubakar washimuswe ari kumwe n’umugore we. Amabandi y’abasirikare yabakuye mu modoka yabo ku wa gatandatu tariki 30 Gicurasi 2026 muri Leta yitwa Katsina. Igisirikare cyemereye BBC ayo makuru bavuga ko hari gukorwa ibishoboka byose uwahoze ari umuvugizi w’igisirikare cya Nigeria agatabarwa. Maj Gen Rabe Abubakar yavugiye igisirikare hagati ya 2015 na 2017.

Umuvugizi w’igisirikare Gen Michael Onoja yabwiye itangazamakuru ko bari gukora ibishoboka byose kugirango bamenye aho ari atabarwe. Nigeria ikomeje kugira zimwe muri Leta zigabijwe n’amabandi aho ashimuta abaturage, igasaba Leta kubishyura kugirango barekurwe. Si ibyo gusa kuko ayo mabandi aniba inka z’abaturage n’imyaka yabo.

 Leta zirimo Zamfara, Sokoto na Katsina ziri mu zigaruriwe n’ayo mabandi yitwaje imbunda akorana n’abajihadisite bagendera ku matwara akaze ya kiyisilamu. Kugeza ubu nta mabandi yari yigamba gushimuta uwo mujenerali ariko hategerejwe ko hagira abahamagara umuryango we.

Uwo musirikare yashimuswe agiye mu bukwe. Imodoka ye barayitambitse barayihagarika bamusohoramo. Mbere y’umunsi umwe, ku itariki 29 Gicurasi 2026 muri Katsina habereye ubwicanyi bwakozwe n’amabandi, haguyemo abaturage 16. Kugeza ubu polisi nta kintu yari yatangaza kuri ubwo bwicanyi.