Mu gitondo cyo kuri uyu wa Gatatu tariki 27 Gicurasi 2026, nibwo ikipe ya APR FC yabyutse itangaza ko hari abakinnyi bayo bahamagawe mu ikipe y’igihugu y’u Rwanda. Muri abo bakinnyi barimo Niyigena Clement, Byiringiro Gilbert, Nshimiyimana Yunusu, Ruboneka Jean Bosco, Niyomugabo Claude ndetse na Hakizimana Adolphe.

Ikipe ya APR FC yabimburiye andi makipe ya hano mu Rwanda gutangaza abakinnyi bahamagawe mu ikipe y’igihugu. Iyi kipe  yabitangaje mu gihe umutoza w’ikipe y’igihugu, Stephen Costantine ataratangaza urutonde rwose rw’abakinnyi bamaze guhamagarwa.

Mu ikipe y’igihugu y’u Rwanda Amavubi byitezwe ko hari abakinnyi bashya bazahamarwa bwa mbere bagomba kwiyongera kuri Mikels Joy-Lance na Mikels Leroy Jacques baheruka kwitwara neza ari bwo bitabiriye ubutumire bw’ikipe y’igihugu bwa mbere. 

Undi mukinnyi watangajwe ko yahamagawe ni Mbonyumwami Taiba ukina muri Marine FC nyuma yo gutsinda ibitego birenga 10 muri Shampiyona y'u Rwanda.

Ku itariki 19 Gicurasi 2026, nibwo ishyirahamwe ry’umupira w’amaguru hano mu Rwanda, FERWAFA, ndetse n’umutoza bemeje ko ikipe y’igihugu y’u Rwanda Amavubi izakina imikino ya gishuti irimo uwo izakina na Tanzania ndetse na Comoros mu buryo bwo kwitegura imikino yo gushaka itike yo gukina igikombe cy’Afurika kizaba umwaka utaha.

Iyi mikino ikipe y’igihugu y’u Rwanda izayikinira muri Marocco ari naho bazakorera umwiherero. Ikipe y’igihugu y’u Rwanda Amavubi iheruka kwisanga iri mu itsinda rya K, aho izaba iri kumwe na Liberia, Cape Verde ndetse na Mali.

Mbonyumwami Taiba nawe yahamagawe mu ikipe y'igihugu