Kinyarwanda
English
&format=webp)
Ngoma: Hibutswe abari abakozi n'abanyeshuri muri G.S Kabare bazize Jenoside yakorewe Abatutsi mu 1994
Mu Rwunge rw'Amashuri rwa Kabare ruherereye mu Murenge wa Kibungo mu karere ka Ngoma, habereye igikorwa cyo kwibuka abari abakozi, abarimu n'abanyeshuri bazize Jenoside yakorewe Abatutsi mu 1994. Mu butumwa bwahatangiwe, urubyiruko rwasabwe guharanira Ubumwe n'Ubudaheranwa by'Abanyarwanda.
Ku gicamunsi cyo kuwa Gatatu tariki ya 20 Gicurasi 2026, abayobozi mu karere ka Ngoma bifatanyije n’Ubuyobozi bw'Urwunge rw'Amashuri rwa Kabare n'abanyeshuri ndetse n'abarimu mu gikorwa cyo Kwibuka ku nshuro ya 32 Jenoside yakorewe Abatutsi mu 1994, hibukwa by'Umwihariko abari abarimu, abakozi ndetse n’abanyeshuri bahigaga bishwe muri Jenoside yakorewe abatutsi mu 1994.
Ubuyobozi bw’Urwunge rw' Amashuri rwa Kabare (G.s Kabare )bwagaragaje ko buzakomeza gukorana n’inzego zitandukanye mu gushakisha amakuru y’abataramenyekana bahakoraga n'abahigaga bazize Jenoside yakorewe Abatutsi mu 1994.
Umuyobozi w’Akarere Ngoma Niyonagira Nathalie , yashimiye Ubuyobozi bwa G.S Kabare bwateguye iki gikorwa cyo kwibuka no kuzirikana abari abakozi n’abanyeshuri muri icyo kigo bazize Jenoside yakorewe Abatutsi mu 1994, anabutsa ko Kwibuka ari Inshingano za buri wese.
Yagize ati: “Kwibuka ni inshingano za buri Munyarwanda. Ni umwanya wo kuzirikana amateka igihugu cyacu cyanyuzemo no gukomeza kubaka ubumwe bushingiye k' ukuri n’ubudaheranwa.”
Meya Niyonagira yanibukije urubyiruko ko rufite uruhare rukomeye mu kubungabunga amateka no kurwanya ingengabitekerezo ya Jenoside n’urwango urwo ari rwo rwose, ahubwo rugashyira imbere indangagaciro z’ubumwe, ubudaheranwa n’ubunyarwanda.
Mu Rwunge rw'Amashuri rwa Kabare( G.s Kabare hamaze kumenyekana abantu 25 bari abarimu, abakozi n’abanyeshuri bazize Jenoside yakorewe Abatutsi mu 1994.
