Muri iki gikorwa cyo kwibuka imiryango yazimye mu karere ka Ngoma cyabaye ku wa 22 Gicurasi 2026, Mu buhamya bwatanzwe na madamu Mukankuranga Beatrice, yagarutse ku buryo Abatutsi biciwe ku cyahoze ari komini Kigarama bishwe mu buryo ndengakamere anagaragaza ko  abari abayobozi barimo uwari Minisitiri w'Ubutegetsi bw'Igihugu, uwayoboraga interahamwe ku rwego rw'Igihugu na Col Rwagafirita  bagize uruhare mu gutuma Jenoside ikoranwa ubukana mu cyahoze ari komini Kigarama kuko ariho bari batuye.

Umuyobozi w'Akarere ka Ngoma, Madamu Niyonagira Nathalie mu ijambo yagejeje ku bitabiriye icyo gikorwa cyo kwibuka imiryango yazimye muri Jenoside yakorewe Abatutsi mu 1994, yagarutse ku bugome ndengakamere bwaranze abishe Abatutsi muri Jenoside.

Yagize ati "Uyu munsi turi hano twibuka inzirakarengane z'abatutsi bishwe bazira uko bavutse, turibuka by'umwihariko abishwe muri Jenoside imiryango yabo ikazma,  bishwe mu buryo bw'ubugome ndengakamere,  bicwa urw'agashinyaguro, bityo bakaba barasize mu miryango yabo nta n'uwo kubara inkuru."

Meya Niyonagira yakomeje agira ati "Kwibuka ni inshingano ya buri wese ariko akaba ari n'umwanya wo guha icyubahiro abazize Jenoside no gukomeza  gufata mu mugongo Abarokotse Jenoside yakorewe Abatutsi mu 1994 no gusigasira amateka kugirango Jenoside itazongera ukundi haba mu gihugu cyacu n'ahandi."

Uwari uhagarariye IBUKA, Mukarugamba Jacqueline, yasabye urubyiruko guharanira kumenya ukuri ku mateka ya Jenoside yakorewe Abatutsi mu 1994

Yagize ati "Kwibuka Jenoside yakorewe Abatutsi by'umwihariko Imiryango yazimye, ni uguha icyubahiro abishwe bazira uko bavutse, kwibuka bifasha mu gukomeza imitima y'abarokotse no kubafasha gukira ibikomere by'amateka mabi babayemo, kwibuka kandi bituma amateka asobanurwa neza, agasobanurwa uko ari cyane cyane urubyiruko rukumva ukuri ku byabaye kuko byabaye batariho."

Perezida w'Inama Njyanama y'Akarere ka Ngoma, Banamwana Bernard  mu ijambo rye yagarutse ku buryo Abatutsi barimo n'abo mu miryango yazimye bishwe mu buryo ndengakamere.

Yagize ati "Iyo tuvuga  kwibuka imiryango yazimye,  twibuka abagore n'abagabo, biciwe imbere y'abana babo, bishwe urw'agashinyaguro ndetse harimo n'abakoreshejwe mu kwica ababo, abo bose turabibuka kandi turabazirikana. Ubu twakabaye turi kumwe bishimye bakabaye ari basekuru b'abana babo, inkumi n'abasore bakabaye ari abasore babyariye u Rwanda bakarugirira akamaro, turabibuka."

Banamwana yakomeje agira ati "Aba twibuka, turabibuka kubera ko mbere bari bariho, bari bafite izina, bari  bafite inzozi, bafite ingo, bafite urukundo bafite n'ibindi natwe dufite nk'abantu. Twaje kubibuka kuko nta wundi bafite uretse twebwe, niyo mpamvu tugomba guhora dufatanya kugira ngo igikorwa nk'iki  kigende neza tubahe agaciro."

Mu turere twose  imiryango yazimye ingana na 15, 594 igizwe n'abantu 68, 871. Mu karere ka Ngoma umubare w'imiryango yazimye ntiramenyekana mu gihe Umurenge wa Remera imiryango yazimye irenga 72. Abatutsi biciwe ahahoze ibiro bya komini Kigarama muri Jenoside yakorewe Abatutsi barenga 900.