Ku Rwibutso rwa Jenoside yakorewe Abatutsi mu 1994 rwa Gihango mu Murenge wa Gihango niho habereye igikorwa cyo kwibuka by’umwihariko abagore n’abana bishwe muri Jenoside mu 1994 ku rwego rw'Akarere ka Rutsiro.

Mu  butumwa bwatangiwe muri uyu muhango bwibanze ku kugaruka ku mateka agaragaza uburyo Jenoside yateguwe hagamijwe kurimbura Abatutsi.

Madamu Dusabimana Gerardine wari uhagarariye IBUKA yavuze ko kwibuka abagore n’abana bifite igisobanuro gikomeye kuko Jenoside yakorewe Abatutsi yateguwe ndetse igashyirwa mu bikorwa hagamijwe kurimbura Abatutsi.

Yagize ati: “Ndashimira by’umwihariko Leta y’Ubumwe bw’Abanyarwanda yashyizeho gahunda yo kwibuka abagore n’abana bazize Jenoside yakorewe Abatutsi mu 1994. Kwibuka iki cyiciro bifite igisobanuro gikomeye kuko abicanyi bari bafite umugambi wo kurimbura Abatutsi. Iyo bicaga abagore n’abana ntibari bagamije gusa kwica ahubwo bari bagamije kuzimya ejo hazaza h’Abatutsi kugira ngo hatazagira uwongera kubaho.”

Guverineri w'Intara y'Iburengerazuba Jean Bosco Ntibitura mu ijambo yagejeje ku bitabiriye igikorwa cyo kwibuka abagore n'abana bishwe muri Jenoside yakorewe Abatutsi yabasabye kurwanya abahembera ingengabitekerezo ya Jenoside.

Yagize ati : “Ndashima cyane ubutwari bw’Abarokotse Jenoside yakorewe Abatutsi mu 1994 kuko bakomeje gutwaza baharanira gukomeza kubaho. Ndabasaba gukomeza kwigirira icyizere no kudaheranwa n’ishavu n’agahinda, ahubwo mukomeze ubutwari bwo kubaho no kwiyubaka kuko ubuyobozi bwiza dufite ubu, bwatanze ihumure n’urumuri rw’icyizere gishingiye ku miyoborere myiza.”

Yakomeje agira ati: “Ndabasaba kwamagana mushize amanga abakomeje guhembera ingengabitekerezo ya Jenoside, abapfobya n’abahakana Jenoside yakorewe Abatutsi, ndetse n’uwaba akigaragaraho ivangura iryo ari ryo ryose. Dufatanye kurwanya abagoreka amateka yaba abari mu gihugu cyangwa hanze yacyo.”

 Guverineri Ntibitura yanasabye urubyiruko guharanira kumenya amateka no kubaka Igihugu . Yagize ati “Ndasaba by’umwihariko urubyiruko kumenya amateka ndetse rukagira uruhare mu kubaka u Rwanda rushya, rwitandukanya buri gihe n’ingengabitekerezo ya Jenoside n’ikibi icyo ari cyo cyose.”

 Urwibutso rwa Jenoside yakorewe Abatutsi rwa Gihango rushyinguyemo imibiri 2, 375 y' abazize Jenoside yakorewe Abatutsi mu 1994.