Kinyarwanda
English
&format=webp)
Amerika igiye kohererezwa imibu Miliyoni 32 yo kuyifasha
Sosiyete Verily, ishami ry’ubushakashatsi mu by’ubuzima rya Alphabet, ishamikiye kuri Google, yasabye uburenganzira bwo kurekura imibu igera kuri miliyoni 32 muri leta za California na Florida mu rwego rwo kugabanya ubwiyongere bw’imibu ikwirakwiza indwara.
Ku nkuru dukesha New York Times, inyandiko zashyikirijwe Ikigo cya Leta Zunze Ubumwe z'Amerika gishinzwe kurengera ibidukikije (EPA), zerekana ko iyi mibu izarekurwa ari igitsina gabo gusa kandi yandujwe bagiteriya izwi nka Wolbachia.
Abashakashatsi bagaragaza ko iyi mibu y’igitsina gabo ihuye n’imibu y’igitsina gore yo mu gasozi, amagi iba yateye adashobora kuvamo ibyana, bityo umubare w’imibu ukagenda ugabanuka mu buryo busanzwe.
Impuguke zigaragaza ko ibi bidateye impugenge kuko imibu y’igitsina gabo itanywa amaraso y’abantu kandi idatera ibisebe nk’imibu y’igitsina gore.
Gukoresha Wolbachia mu kurwanya imibu si ubwa mbere bikorwa. Mu myaka yashize, Verily n'ibindi bigo byakoze igerageza nk'iryo mu bice bitandukanye bya California ndetse no mu bindi bihugu byibasiwe n'indwara ziterwa n'imibu nka Haiti.
Verily yavuze ko intego y’uyu mushinga atari ukongera imibu ahubwo ari ugufasha kugabanya amoko y’imibu ashobora gukwirakwiza indwara.
Nubwo benshi bagaragaje impugenge, abashakashatsi bavuga ko ubu buryo bumaze imyaka myinshi bugeragezwa kandi bugamije kugabanya ibyago by'indwara aho kubyongera.
