Nk’uko byatangajwe na Perezida Macron abicishije ku rubuga rwe rwa X, mu byo baganiriye harimo ikibazo cy’ubuzima rusange mu burasirazuba bwa RDC, ahakomeje kugaragara icyorezo cya Ebola. Abakuru b’ibihugu byombi bongeye gushimangira ubushake bwabo bwo gukomeza gukorana mu buryo buhujwe hagamijwe guhangana n’iki cyorezo no kurinda ubuzima bw’abaturage.

Impande zombi zanagaragaje intego yo gukomeza gushimangira umubano n’ubufatanye hagati y’u Bufaransa na RDC, by’umwihariko mu rwego rw’ubukungu. Byagaragajwe ko urwego rw’abikorera ruzagira uruhare rukomeye mu guteza imbere ubwo bufatanye no kongera ishoramari hagati y’ibihugu byombi.

Ku bijyanye n’umutekano mu burasirazuba bwa RDC, Perezida w’u Bufaransa yagaragaje ko igihugu cye gishyigikiye ibikorwa by’amahoro biri gukorwa kugira ngo haboneke ituze rirambye. Yashimangiye ko u Bufaransa bushyigikiye gahunda zigamije kugarura ubusugire bwuzuye bwa RDC ku butaka bwayo bwose.

Ibi biganiro byerekanye ubushake bw’impande zombi bwo gukomeza ubufatanye mu guhangana n’ibibazo by’ubuzima, guteza imbere ubukungu no gushaka ibisubizo birambye ku bibazo by’umutekano bikomeje kwibasira uburasirazuba bwa RDC.