Castro ari kuregwa ibyaha birimo ubwicanyi, umugambi wo kwica abaturage ba Amerika ndetse no guturitsa indege. Ibi birego byatangajwe n'urukiko rwo muri Miami ni mu gihe umwuka hagati y' ibihugu byombi ukomeje kuba mubi.

Iyi dosiye igaragaza ko ibi byabaye tariki ya 24 Gashyantare 1996, ubwo indege za gisirikare za Cuba zarasaga indege ebyiri nto z'umuryango witwa "Brothers to the Rescue" wari uzwiho gukorera ibikorwa by'ubutabazi impunzi z'Abanya-cuba.

Leta ya Amerika ivuga ko izo ndege zari mu kirere mpuzamahanga mu butumwa bw'ubutabazi, ariko Cuba yo ikavuga ko izi ndege zakunze kwinjira mu kirere cyayo my buryo butemewe kandi ko zari ikibazo ku mutekano w'igihugu.

Perezida wa Cuba Miguel Diaz-Canel yamaganye ibi birego avuga ko bishingiye ku kwangiriza umubano wa politiki, anashinja Washington kongera kuzamura ubushyamirane bwo gihe cy'Intambara y'Ubutita hagati y'ibihugu byombi. Mu ijambo rye, Diaz-Canel yavuze ko "Amerika iri gukoresha ubutabera nk'intwaro ya politiki," ashimangira ko Cuba itazemera ibikorwa byo kuyiharabika.

Abasesenguzi ba politiki bavuga ko bishoboka ko Castro atazigera yoherezwa muri Amerika kuburana, kuko afite imyaka irenga 90 kandi akomeje kuba muri Cuba.

Ku ruhande rw'imiryango y'abahitanywe n'icyo gitero ndetse n'amashyirahamwe y'impunzi z'Abanya-Cuba baba muri Amerika bavuga ko ibi birego ari ingaruka z'ubutabera bwakererewe.      

Umwe mu bagize umuryango wabuze uwabo yavuze ati: “Twategereje imyaka myinshi kugira ngo haboneke umuntu ubazwa urupfu rw’abacu. Nubwo byatinze, nibura hari icyizere cy’uko ukuri kuzajya ahagaragara.”

Iki kibazo cyongeye kuzamura amateka maremare y’umwuka mubi hagati ya Cuba na Amerika, ibihugu bimaze imyaka myinshi birebana ay’ingwe kubera politiki.