Shahed-136 yakozwe n’uruganda rwa gisirikare rwa Iran rwitwa Shahed Aviation Industries. Ifite ishusho yihariye imeze nk’ibaba rya mpandeshatu (delta wing), ikagira moteri inyuma n'agasongero imbere gatuma igenda yihuta.

Ubusanzwe Shahed-136 iba ifite uburebure bwa metero hafi 3.5 n’amababa afite metero 2.5, ikaba ishobora gutwara umutwaro w’ibisasu uri hagati y'ibiro 40 na 50, ndetse bishobora no kugera kuri 90. Ishobora kugenda intera ndende cyane, hagati ya kilometero 1,000 na 2,500 bitewe n’uburyo yakoreshejwe. 

Ikintu gituma Shahed-136 iba ikomeye si umuvuduko wayo ahubwo ni igiciro gito n’ubwinshi ishobora gukorwamo. Bivugwa ko imwe ishobora kugura hagati y'amadorari ibihumbi 20 na 80 gusa, mu gihe missile yo kuyihagarika ishobora kurenga miliyoni nyinshi z’amadolari. Ibi bituma igihugu kiyikoresha gishobora kohereza drones nyinshi icyarimwe, kigahatira umwanzi gukoresha amafaranga menshi mu kwirwanaho. 

Mu gihe ikoranabuhanga rya gisirikare rikomeza gutera imbere, Shahed-136 irerekana neza ko intambara z’uyu munsi zitagishingira gusa ku ntwaro zihenze cyane, ahubwo no ku ntwaro zoroheje ariko zifite ingaruka zikomeye. Ni yo mpamvu iyi drone ikomeje kuba kimwe mu bikoresho by’ingenzi bihindura isura y’intambara z’iki gihe.