Ku wa Gatanu tariki ya 29 Gicurasi 2026, Minisitiri Dominique Habimana yifatanyije n’abaturage b’Akarere ka Gicumbi mu muhango wo gusoza ku mugaragaro umushinga Green Gicumbi.

Umushinga green Gicumbi, wari umaze imyaka itandatu ushyirwa mu bikorwa hagamijwe guhangana n’imihindagurikire y’ibihe no guteza imbere ubukungu butangiza ibidukikije wasojwe ku wa Gatanu nkuko tubikesha Ikigo cy'igihugu cy'Itangazamakuru RBA.

Uyu mushinga watangiye mu mwaka wa 2019, ugamije gufasha abaturage bo mu bice byugarijwe n’ingaruka z’imihindagurikire y’ibihe kubona ibisubizo birambye bibafasha kongera umusaruro, kurengera ibidukikije no guhindura imibereho yabo.

Mu ijambo yagejeje ku bitabiriye uyu muhango wo gusoza umushinga Green Gicumbi, Minisitiri w'Ubutegetsi bw'Igihugu Habimana Dominique yashimye ibikorwa byagezweho muri uyu mushinga, avuga ko byagize uruhare rukomeye mu kuzamura imibereho y’abaturage no kubafasha guhangana n’ibibazo biterwa n’imihindagurikire y’ibihe.

Yagize ati “Nta gushidikanya ko ibikorwa umushinga wakoze byagize uruhare mu kuzamura abaturage, nk’uko byagiye bigaragazwa n’ibipimo by’ubushakashatsi butandukanye.”

Minisitiri w'Ubutegetsi bw'Igihugu yanavuze ko ibikorwa by’umushinga Green Gicumbi byafashije abaturage gusobanukirwa uburyo bugezweho bwo kubungabunga ubutaka, kongera umusaruro w’ubuhinzi ndetse no kwirinda ibiza bikunze guterwa n’imvura nyinshi cyangwa amapfa, anasaba kubungabungwa ibyagezweho muri uwo mushinga.

Yagize gize ati “Ibi biraduha inshingano zo kuzakomeza kubungabunga ibyo umushinga Green Gicumbi wagezeho ndetse no kubibyaza umusaruro. Nta kudohoka kuri izi nshingano.”

Minisitiri Habimana yanavuze ko ubufatanye hagati y’inzego za Leta, abafatanyabikorwa mu iterambere ndetse n’abaturage ubwabo ari bwo bwatumye uyu mushinga ugera ku ntego zawo, asaba ko uwo iyo mikoranire wakomeza no mu yindi gahunda y’iterambere.

Mu myaka irenga 6 uwo mushinga wamaze ushyirwa mu bikorwa, ibikorwa byinshi byawo byibanze ku kubungabunga ibidukikije no gufasha abaturage kwihanganira ingaruka z’imihindagurikire y’ibihe byarakozwe. Muri byo bikorwa byakozwe harimo gutera ibiti ku misozi no mu bice byari byarangiritse, ibikorwa byafashije mu kurwanya isuri no kongera ubwiza bw’ibidukikije.

Hanakozwe amaterasi y’indinganire ku buso bunini bw’ubutaka kugira ngo hafatwe neza ubutaka n’amazi, bikaba byaragize uruhare mu kongera umusaruro w’ubuhinzi no kugabanya iyangirika ry’ubutaka. Uyu mushinga wanateje imbere ikoreshwa ry’ingufu zitangiza ibidukikije zirimo amashyiga avuguruye n’ubundi buryo bwo kugabanya ikoreshwa ry’inkwi n’amakara, bituma uwo mushinga  ugira uruhare mu kurengera amashyamba no kugabanya imyuka ihumanya ikirere.

Mu rwego rwo guteza imbere imibereho myiza y’abaturage, Green Gicumbi yanubatse imidugudu ibiri igezweho yatujwemo imiryango ijana yari ituye mu manegeka cyangwa mu bice byugarijwe n’ibiza. Abaturage bitabiriye umuhango wo gusoza uyu mushinga bamuritse ibikorwa byawo byabahinduriye imibereho, by’umwihariko mu kongera umusaruro w’ubuhinzi.

Bamwe mu baturage bavuga ko mbere y’ishyirwa mu bikorwa ry’uyu mushinga bahuraga n’ibibazo by’isuri yangizaga imyaka ndetse n’ibiza byabateraga igihombo, ariko ko ubu bamaze kubona ibisubizo birambye bibafasha gukomeza ibikorwa byabo by’iterambere.