Guhera kuwa mbere Abasenateri basuye Akarere ka Ngoma mu ruzinduko rw'akazi basura ibikorwa bigamije gufasha abaturage kubona akazi baganira ku ihangwa ry’imirimo n’iterambere ry’urubyiruko.

Itsinda ry’Abasenateri rigizwe na Hon Dr Valentine Uwamariya na Hon Prof Jean Pierre Dusingizemungu bari mu bagize Komisiyo y’Imibereho myiza y’Abaturage, Uburezi, Ikoranabuhanga n’Urubyiruko mu Nteko Ishinga Amategeko Umutwe wa Sena niryo ryagiriye uruzinduko mu karere ka Ngoma rwatangiye ku wa mbere tariki ya 18 Gicurasi rukomeza kuri uyu wa Kabiri tariki ya 19 Gicurasi 2026 bagirana ibiganiro n'inzego zihagarariye ibyiciro bitandukanye muri ako karere ka Ngoma.

Urwo  ruzinduko rw'intumwa za rubanda rugamije kureba uko gahunda yo guhanga imirimo ishyirwa mu bikorwa ndetse no guteza imbere urubyiruko.

Mapambano Nyiridandi Cyriaque, umuyobozi w'Akarere ka Ngoma wungirije ushinzwe Iterambere ry'ubukungu, yagaragaje ko Akarere ka Ngoma gakomeje gushyira imbaraga mu guhanga imirimo mishya no guteza imbere imyuga.

Visi Meya Mapambano yavuze ko "Akarere kihaye intego yo guhanga imirimo mishya 22,500 mu gihe cy’imyaka itanu iri imbere."

Yagaragaje ko iyi ntego izagerwaho binyuze mu kongerera ubushobozi udukiriro no guteza imbere ibikorwa bifasha urubyiruko rwize imyuga kwihangira imirimo no kubona akazi.

Visi Meya Mapambano yasobanuye ko "ubufatanye hagati y’inzego za Leta n’abikorera bukomeje kugira uruhare rukomeye mu guteza imbere ubukungu bw’Akarere no kuzamura imibereho y’abaturage, cyane cyane urubyiruko."

Ku gicamunsi cyo kuwa mbere , Abasenateri basuye umushinga w’ubworozi bw’amafi bukorwa na Sosiyete Natural YIPIN Ecological Agriculture Ltd ikorera mu Murenge wa Rukumberi, basobanuriwe uburyo ikoranabuhanga rikoreshwa mu bworozi bw’amafi, kuva ku mirama iterwa mu bigega by’amazi kugeza igihe amafi asaruriwe. Uwo mushinga ukorerwa ku buso bwa hegitari 3,5 kandi umaze gutanga akazi ku bakozi bahoraho 30.

Abasenateri bashimye uruhare rw’uyu mushinga mu guteza imbere ubuhinzi n’ubworozi bushingiye ku ikoranabuhanga ndetse no gufasha abaturage kubona akazi, bavuga ko ari imwe mu nzira zifasha igihugu kugera ku ntego zo guteza imbere urubyiruko no kugabanya ubushomeri mu rubyiruko.

Kuwa mbere kandi Abasenateri bari basuye ishuri Rwanda Polytechnic, College ya Ngoma ryigisha amasomo y'imyuga n'ubumenyi ngiro ndetse bari basuye agakiriro ka Ngoma.

Uruzinduko Abasenateri barimo mu turere dutandukanye bazasura udukiriro, ibyanya by'inganda, amashuri yisumbuye n'amakuru yigisha imyuga n'ubumenyi ngiro ndetse n'ibindi bikorwa bigira uruhare muri gahunda yo guhanga imirimo mishya.