Kinyarwanda
English
&format=webp)
RSSB Tigers ikomeje kwesa imihigo
Ikipe ya RSSB Tigers BBC ikomeje gutsinda imikino ya BAL Africa 2026 ibaye ku nshuro ya 6. Iyi kipe yatsinze Petro de Luanda amanota 82 kuri 78 mu mukino wa kabiri w’imikino iri kubera muri Afurika y’epfo.
Ku mugoroba wo ku cyumweru, tariki ya 29 Werurwe 2026, habaye umukino wa BAL Africa 2026, wari utegerejwe cyane wahuje RSSB Tigers na Petro de Luanda. Ni umukino wahuje amakipe yombi ari guhabwa amahirwe yo kuyobora itsinda rya Kalahari Conference.
Uyu mukino watangiye utuje, amakipe yombi atagaragaza imbaraga nyinshi mu gutsinda amanota menshi. Agace ka mbere karangiye Petro de Luanda iyoboye n’amanota 17 kuri 12 ya Tigers.
Mu gace ka kabiri, RSSB Tigers yagerageje kwinjira neza mu mukino, aho Ntore Habimana na Leonard Craig Randall bayitsindiye amanota afatika. Aka gace RSSB Tigers BBC yakegukanye ku ntsinzi y’amanota 22 kuri 19.
Igice cya mbere cyarangiye ikinyuranyo cyagabanyutse, ariko Petro de Luanda igikomeje kuyobora uyu mukino n’amanota 36 kuri 34 ya Tigers.
Mu gace ka gatatu, umukino warushijeho gufata indi ntera, amakipe yombi azamura imikinire. Mangok Mathiang Ayub na Teafale Lenard Jr batsindiye RSSB Tigers amanota menshi, mu gihe ku ruhande rwa Petro de Luanda, Childe Dundao, Kacuol Dut Jok na Abou Bacar Pedro Gakou nabo bitwaye neza. RSSB Tigers yegukanye aka gace ku manota 23 kuri 20, bihita bituma itangira kuyibora umukino n’amanota 57 kuri 56.
Mu gace ka nyuma, Tigers yinjiye ifite imbaraga nyinshi, aho abakinnyi bayo barimo Leonard Craig Randall na Teafale Lenard Jr bakomeje gutsinda amanota menshi, batuma ikinyuranyo kigera mu manota 10 kuko yahise aba 72 kuri 62.
Uyu mukino waje kurangiye RSSB Tigers BBC itsinze Petro de Luanda ku manota 82 kuri 78. Ni umukino wa kabiri RSSB Tigers ibashije gutsinda mu mikino ya BAL Africa y’uyu mwaka. Iyi kipe yatsinze Al Ahly Benghazi mu mukino wa mbere, mu gihe Petro de Luanda yari iherutse gutsinda Al Ahly Benghazi.
RSSB Tigers irabura imikino itatu gusa, mu gihe yabasha kwitwara neza izahita ibona itike yo gukina imikino ya nyuma ya BAL izabera i Kigali. Ku wa Gatatu w’icyumweru tugiye gutangira, tariki ya 1 Mata 2026, nibwo RSSB Tigers BBC izagaruka mu kibuga ikina na Johannesburg Giants yo muri Afurika y’Epfo ari naho hari kubera iyi mikino.
RSSB Tigers ikomeje kwitara neza mu mikino ya BAL Africa
Tags:
