Aya masezerano yashyiriweho umukono I Kigali ku wa 19 Gicurasi 2026, mu rwego rwo gukomeza ubufatanye hagati y’ibihugu byombi mu guteza imbere ikoreshwa ry’ingufu za Nikeleyeri mu bikorwa bya gisivili no mu buryo bwubahiriza amahoro.

Ku ruhande rwa Amerika, amasezerano yasinywe na Renee Sonderman, Umuyobozi Mukuru Wungirije w’Agateganyo ushinzwe Ibikorwa byo kugenzura Intwaro no kudakwirakwiza Intwaro za Kirimbuzi muri Minisiteri y’Ububanyi n’Amahanga ya Amerika. Ku ruhande rw’u Rwanda, yasinywe na Dr. Usta Kaitesi, Umunyamabanga wa Leta muri Minisiteri y’Ububanyi n’Amahanga n’Ubutwererane.

Aya masezerano agamije guteza imbere imikoranire mu gukoresha ingufu za Nikeleyeri mu buryo bwa gisivili, harimo mu nzego zishobora gufasha iterambere rirambye nk’ubuvuzi, ubushakashatsi, ubuhinzi ndetse n’ingufu.

Isinywa ry’aya masezerano rije mu gihe u Rwanda rukomeje kongera imbaraga mu guteza imbere urwego rw’ingufu za Nikeleyeri, hagamijwe gushyigikira gahunda z’iterambere no gukoresha ikoranabuhanga mu buryo bwizewe kandi buboneye.

Biteganyijwe ko ubu bufatanye hagati y’u Rwanda na Amerika buzarushaho gufasha mu gusangizanya ubumenyi, guteza imbere ubushobozi bw’abakozi ndetse no gukurura amahirwe mashya y’ishoramari mu rwego rw’ingufu za Nikeleyeri zigamije amahoro.