Aya masezerano yasinywe ku wa 07 Gicurasi 2026 azwi nka Country Partnership Framework (CPF), yashyizweho umukono na Minisitiri w’Ibikorwa Remezo, Dr. Jimmy Gasore hamwe n’Umuyobozi Mukuru wa ISA, Ashish Khanna, mu ruzinduko rw’itsinda rikuru rya ISA mu Rwanda.

Aya masezerano ashyiraho gahunda yihariye igamije guteza imbere ikoreshwa ry’ingufu z’imirasire y’izuba mu nzego zitandukanye zirimo ubuhinzi bukoresha ikoranabuhanga rishingiye ku mirasire y’izuba, kongera uburyo abaturage babona amashanyarazi, guteza imbere solar zishyirwa ku mazu, kongerera abaturage ubumenyi n’ubushobozi muri uru rwego ndetse no kunoza amategeko n’uburyo bwo gushora imari.

Biteganyijwe kandi ko aya masezerano azafasha gukurura ishoramari ry’abikorera mu bikorwa bitandukanye bifitanye isano n’ingufu z’imirasire y’izuba, birimo uburyo bwo kuhira imyaka hifashishijwe solar ndetse n’ikoranabuhanga rifasha abaturage kongera umusaruro n’iterambere mu mibereho yabo ya buri munsi.

Guverinoma y’u Rwanda ikomeje gushyira imbaraga mu gukoresha ingufu zisubira no guteza imbere ibisubizo birambye mu rwego rw’ingufu, hagamijwe guteza imbere ubukungu no kugabanya ibibazo biterwa n’imihindagurikire y’ikirere.