Kinyarwanda
English
&format=webp)
Ubumwe bw’Abanyarwanda ni ryo shingiro ry’iterambere igihugu gifite uyu munsi - Col Désiré Migambi
Mu gihe u Rwanda n’Isi yose bakomeje ibikorwa by’iminsi 100 byo Kwibuka ku nshuro ya 32 Jenoside yakorewe Abatutsi mu 1994, Umuyobozi ushinzwe ubufatanye bw’Ingabo n’abaturage mu Rwanda, Col Désiré Migambi Mungamba, yifatanyije n’abanyamuryango b’Ishyirahamwe ry’Umukino wa Golf mu Rwanda (Rwanda Golf Union) mu mugoroba wo kwibuka no guha icyubahiro abazize Jenoside yakorewe Abatutsi.
Iki gikorwa cyabereye ku kibuga cya Golf cya Nyarutarama ku wa Gatandatu, tariki ya 9 Gicurasi 2026, cyitabirwa n’abayobozi n’abakozi bo mu nzego zitandukanye zirimo Minisiteri ya Siporo, Minisiteri y’Ubumwe bw’Abanyarwanda n’Inshingano Mboneragihugu ndetse na Minisiteri y’Ingabo.
Abitabiriye uyu mugoroba bafashe umwanya wo kuzirikana amateka igihugu cyanyuzemo, banashimangira umuhate wo gukomeza kwimakaza ubumwe n’ubudaheranwa mu Banyarwanda.
Mu ijambo rye, Col Migambi yagarutse ku mateka yaranze u Rwanda mbere ya Jenoside yakorewe Abatutsi, agaragaza uko politiki mbi zashingiye ku ivangura n’amacakubiri zagejeje igihugu mu bihe by’icuraburindi mu 1994.
Yagize ati “Kwibuka ni inshingano ya buri munyarwanda, kuko bidufasha gusigasira amateka no kurinda urubyiruko kugwa mu mutego w’abashaka gupfobya cyangwa guhakana Jenoside yakorewe Abatutsi.”
Yanavuze ku rugamba rwo kubohora Igihugu rwari ruyobowe na FPR Inkotanyi, ashimangira ko rwabaye umusingi w’ihagarikwa rya Jenoside ndetse no kongera kubaka igihugu cyunze ubumwe.
Ati "Ubumwe bw’Abanyarwanda ni ryo shingiro ry’iterambere igihugu gifite uyu munsi. Tugomba gukomeza kuburinda no kubusigasira kugira ngo amateka mabi atazongera kubaho ukundi.”
Col Migambi kandi yagaragaje ko u Rwanda rumaze gutera intambwe ishimishije mu rugendo rw’ubumwe n’ubwiyunge, aho Abanyarwanda bakomeje gushyira imbere ubufatanye, amahoro n’iterambere.
Kugeza ubu, mu bakinnyi ba Golf bamaze kumenyekana ko bishwe muri Jenoside yakorewe Abatutsi mu Rwanda, harimo Sakumi Anselme, Bukaka Gérard na Dr Munyangeyo Charles.
Abitabiriye iki gikorwa kandi basabwe gukomeza gusigasira amateka no kurwanya ingengabitekerezo ya Jenoside n’icyo ari cyo cyose cyasubiza inyuma ibyagezweho, hagamijwe ko Jenoside itazongera kubaho ukundi mu Rwanda.
Col Désiré Migambi ari guha igihembo, Mukunde Diane
Col Désiré Migambi yifatanyije n’abanyamuryango b’Ishyirahamwe ry’Umukino wa Golf mu Rwanda mu gikorwa cyo Kwibuka 32, Jenoside yakorewe Abatutsi mu 1994.
Abakinnyi ba Golf basanga gukina ari ukubaka ubumwe
Tags:
