‎Ni ubutumire bwatanzwe kuri uyu wa 10 Gicurasi 2026, butanzwe na Ambasaderi w’u Rwanda mu Buhinde, Mukangira Jacqueline, abugeza kuri Minisitiri wungirije ushinzwe Ingufu za Atomike mu Buhinde, Jitendra Singh.

‎Ishami rishinzwe ingufu za atomike mu Buhinde ryatangaje ko Minisitiri Singh yemeye kuzitabira iyo nama binyuze mu buryo bw’ikoranabuhanga, aho azatanga ikiganiro ku ruhare rwa siyansi n’ikoranabuhanga mu iterambere.

‎Iyo nama izabera muri Kigali Conv Centre ku bufatanye bw’inzego n’imiryango mpuzamahanga zirimo International Atomic Energy Agency (IAEA), Nuclear Energy Agency (NEA) na World Nuclear Association (WNA).

‎Mu biganiro byahuje impande zombi, u Rwanda n’u Buhinde byagaragaje ubushake bwo kurushaho guteza imbere ubufatanye mu nzego za siyansi n’ikoranabuhanga, guhanga ibishya, ikoreshwa ry’ingufu za atomike ndetse no kubaka ubushobozi mu ikoranabuhanga rigezweho.

‎Hanagarutswe ku mahirwe y’ubufatanye mu nzego zirimo ubwenge buhangano (AI), ikoranabuhanga rikoreshwa mu buvuzi ndetse n’ibijyanye n’ubushakashatsi ku isanzure.

‎U Rwanda rwagaragaje kandi ubushake bwo gukorana n’ibigo bitandukanye byo mu Buhinde hagamijwe guteza imbere ubushakashatsi, guhanga ibishya no kongera ubumenyi mu ikoranabuhanga.

Minisitiri Jitendra Singh yavuze ko u Buhinde bukomeje gushyira imbere ubufatanye n’ibindi bihugu, cyane cyane mu bijyanye na siyansi, guhanga ibishya n’iterambere rirambye.