Muri iri tangazo, Liverpool yavuze ko yatangiye gahunda yo gushaka umutoza mushya uzasimbura Slot, mu gihe ikipe ikomeje kwitegura amarushanwa ari imbere. Umutoza urimo kuvugwa ni umunya-Espagne Andoni Iraola Sagarna watozaga AFC Bournemouth wamaze gusezera iyi kipe. 

Arne Slot asezerewe muri Liverpool FC asize amateka akomeye nyuma yo gufasha iyi kipe kwegukana igikombe cya Premier League Saison 2024/2025. Ubuyobozi bwa Liverpool bwashimiye umusanzu we, buvuga ko azahora yibukirwa ku bw'umurimo yakoze ndetse n'ibyo yagejeje ku ikipe.

Liverpool yagize iti "Arne Slot avuye ku mwanya wo kuba umutoza mukuru kubera impamvu zitunguranye. Inzira yo gushaka umusimbura we irakomeje. Asezerewe afite igikombe cya Premier League mu byo yagezeho kandi tumushimira byimazeyo ku bw'umurimo n'umuhate yagaragaje."

Iyi nkuru yatunguye abafana benshi ba Liverpool ndetse n'abakurikiranira hafi umupira w'amaguru mu Bwongereza, cyane cyane kubera ko Slot yari amaze guha ikipe umusaruro mwiza mu myaka ibiri nubwo uyu mwaka urangiye yitwaye nabi.

Kugeza ubu, nta makuru arambuye aratangazwa ku mpamvu zatumye impande zombi zitandukana. Gusa, ubuyobozi bwa Liverpool bwemeje ko buzatangaza amakuru yisumbuyeho mu gihe gikwiye.

Abafana b'iyi kipe ubu bahanze amaso umutoza uzatoranywa kugira ngo akomeze urugendo rwo guhatanira ibikombe no gukomeza kubaka ikipe ishoboye guhangana ku rwego rwo hejuru mu Bwongereza no ku mugabane w'u Burayi.

Gusezera kwa Arne Slot bifungura igice gishya mu mateka ya Liverpool, mu gihe ikipe yitegura kwinjira mu bihe bishya iyobowe n'undi mutoza uzaba afite inshingano zo gukomeza aho uwo asimbuye agejeje iyi kipe.