Arsenal FC yegukanye igikombe cya shampiyona bwa mbere nyuma y’imyaka 22, mu gihe West Ham United yasoje nabi ku munsi wa nyuma maze imanuka mu cyiciro cya kabiri hamwe na Burnley ndetse na Wolverhampton Wanderers.

Si amakipe yamanutse gusa yari ategerejwe kuri uyu  munsi wa nyuma, kuko hari hasigaye imyanya itanu yo gukina amarushanwa y’i Burayi yagombaga kumenyekana.

Mbere y’imikino yo ku Cyumweru, Arsenal, Manchester City na Manchester United zari zamaze kubona itike ya UEFA Champions League y’umwaka utaha.

Intsinzi ya Aston Villa kuri Liverpool mu mukino wabanje wa shampiyona yari yamaze guha Aston Villa itike ya Champions League, ariko uko irangiza umwanya wayo byari kugira ingaruka ku mubare w’amakipe yo mu Bwongereza yari kujya muri iri rushanwa.

Ikipe ya Aston Villa yatumye Shampiyona y’u Bwongereza ihomba amakipe menshi yari buzitabire imikino y’i Burayi nyuma yo gutsinda Manchester City ibitego 2-1, bityo isoza impaka z’uko amakipe atandatu yo mu Bwongereza ashobora kujya muri Champions League, ndetse inemeza ko amakipe abiri azajya muri Europa League.

Umwanya wa gatanu wa nyuma wajyanaga amakipe muri Champions League wahatanirwaga na Liverpool na AFC Bournemouth.

Aya makipe yombi yanganyije 1-1, Liverpool inganya na Brentford naho Bournemouth inganya na Nottingham Forest, bituma Liverpool isoza iri ku mwanya wa gatanu ibona itike ya UEFA Champions League.

Mu guhatanira Europa League, Bournemouth yari yamaze kwizera kuzasoza nibura iri mu makipe arindwi ya mbere ndetse no kubona itike yo gukina imikino y’i Burayi bwa mbere mu mateka yayo. Kunganya ku munsi wa nyuma byatumye isoza iri ku mwanya wa gatandatu.

Umwanya wa karindwi wahatanirwaga na Brighton & Hove Albion, Chelsea, Brentford na Sunderland.

Igitangaje ni uko Sunderland yageze ku munsi wa nyuma iri kure cyane y’uyu mwanya ariko iza kwitwara neza itsinda Chelsea FC ibitego 2-1 bituma izamuka iva ku mwanya wa 10 igera ku wa 7 nyuma y’uko Brighton itsinzwe na Brentford ikanganya.

Sunderland yabaye ikipe ya 10 mu mateka ya Premier League ibonye itike yo gukina i Burayi mu mwaka wa mbere ihise izamuka iva mu cyiciro cya kabiri. Ni na yo kipe ya gatanu yazamutse ikabona itike yo gukina imikino y’i Burayi binyuze ku rutonde rwa shampiyona, nyuma ya Wolves yabikoze mu 2018-19.

Crystal Palace nayo ishobora kuzifatanya na Bournemouth na Sunderland muri Europa League nitwara igikombe cya Conference League izahuramo na Rayo Vallecano ku wa 27 Gicurasi 2027.

Hari hasigaye kandi umwanya umwe gusa wa UEFA Conference League, wagombaga guhabwa ikipe isoje ku mwanya wa munani.

Chelsea yatangiye gukina iri kuri uyu mwanya ariko gutsindwa na Sunderland byatumye irangiza iri ku mwanya wa 10, umwanya mubi cyane yagezeho nyuma yo kubikora muri saison ya 2022-23.

Iyo tike yegukanywe na Brighton & Hove Albion nubwo yatsinzwe ibitego 3-0 na Manchester United. Gutsindwa kwa Chelsea no gutakaza amanota kwa Brentford byafashije Brighton kubona umwanya wa munani no kubona itike ya Conference League bwa mbere.

Brighton yari yarabonye itike y’i Burayi bwa mbere mu mateka yayo nyuma y’imyaka 122 mu 2023 nyuma yo gusoza ku mwanya wa gatandatu muri Premier League, ariko ubu igiye gukina Conference League bwa mbere mu mwaka utaha.