Ishyirahamwe ry'umupira w'amaguru muri Denmark ryatangaje ko Eriksen yahise yongera kugira ubwenge nyuma y'igihe gito kandi ashobora no kwigenza ava mu kibuga. Muganga w'ikipe y'igihugu, Morten Boesen, yavuze ko igikoresho cyo gufasha umutima Eriksen yambaye cyakoze akazi neza, kimurinda ibibazo bikomeye.

Uyu mukinnyi w'imyaka 34 y'amavuko yigeze guhagarara umutima mu mukino wa Euro 2020 wahuje Denmark na Finland mu mwaka wa 2021, nyuma aza gushyirwamo icyo gikoresho cyihariye gifasha kugenzura imikorere y'umutima.

Abakinnyi ba Denmark na Ukraine bahise bakora uruziga ruzengurutse Eriksen mu gihe yari ari guhabwa ubutabazi bw'ibanze, ibintu byongeye kwibutsa benshi ibyabaye muri Euro 2020. Nyuma y'uko avanywe mu kibuga, amakipe yombi yashimiye abafana mbere y'uko umukino uhagarikwa.

Kapiteni wa Denmark, Pierre-Emile Hojbjerg, yavuze ko buri wese yahise yitwara vuba kandi mu buryo bwubashywe, ashimira cyane abaganga n'abakozi bose bihutiye gutabara mugenzi wabo.

Umutoza wa Denmark, Brian Riemer, yatangaje ko icy'ingenzi ari uko Eriksen ameze neza kandi ko yohereje ubutumwa bwo guhumuriza bagenzi be, ababwira ko ameze neza.

Kuri ubu Eriksen ari gukorerwa ibizamini byimbitse kwa muganga kugira ngo hamenyekane icyateye uku kugwa kwe kwa kabiri mu kibuga, nubwo amakuru ya mbere agaragaza ko ubuzima bwe buhagaze neza.